समाचार

यी हुन् काठमाडाैँमा दिउँसै लुटपाट गर्ने ‘लुटेराहरु’

काठमाडौं, ८ बैशाख । प्रहरीले लुटपाटमा संलग्न भएको आरोपमा ३ जनालाई पक्राउ गरेको छ ।

पक्राउ पर्नेमा काठमाडौं चन्द्रागिरी नगरपालिका-८ मातातीर्थका ३८ वर्षीय नवराज तामाङ, चन्द्रागिरी-८ मातातीर्थकै ३६ वर्षीय विक्रम श्रेष्ठ र नुवाकोटको बेलकोटगढी नगरपालिका-४ कथुरानी घर भई नैकाप बस्दै आएका २८ वर्षीय दिपेश भनिने सन्तबहादुर तामाङ छन्।

उनीहरुले काठमाडौं महानगरपालिका–२९ रानीबारीमा दिउँसै लुटपाट गरेका थिए । महानगरीय प्रहरी अपराध महाशाखाको टोलीले उनीहरुलाई शुक्रबार पक्राउ गरेको हो।

यो समूहमा रहेका अन्य तीन जना लुटेरा भने अझसम्म फरार रहेको प्रहरीले जनाएको छ। उनीहरुले गत चैत २६ गते दिउँसो साढे ११ बजे रानीबारीस्थित लालेन्द्र शेरचनको घरमा लुटपाट गरेका थिए ।

घरमा सुनका गरगहना भएको थाहा पाएपछि योजना नै बनाएर लुटपाट गरेको महानगरीय प्रहरी अपराध महाशाखाले जनाएको छ । घरधनी शेरचन, उनकी श्रीमती भानुदेवी शेरचन र घरमा काम गर्ने मिठु थकालीलाई नियन्त्रणमा लिएर उनीहरुले लुटपाट मच्चाएका थिए।

६ जनाको समूहमा रहेका लुटेराले घरका तीनै जनालाई हातखुट्टा बाँधेर लुटेको प्रहरीले जनाएको छ । जुटको डोरीले हातखुट्टा बाँधेर मुखमा समेत टेप लगाएर खुकुरी तेर्साउदै उनीहरुले लुटेका थिए ।

दराजमा भएको गरगहना र नगद गरी उनीहरुले ५ लाख ६० हजार रुपैयाँ बराबरको धनमाल लुटेको प्रहरीले जनाएको छ। प्रहरीले लुटेराको साथबाट सुनको तिलहरी बरामद गरेको छ भने अन्य गरगहनाहरु फेला परेका छैनन्।

त्यस्तै, लुट्न प्रयोग भएका ट्याक्सी र कारसमेत नियन्त्रणमा लिएको प्रहरीले जनाएको छ। बा २ ज ३०६१ नम्बरको ट्याक्सी र बा ३ च ७१६४ कलेजी रङको कार नियन्त्रणमा लिइएको प्रहरीले जानकारी दिएको छ।

Related Articles

Back to top button
Close